Казан мэрының коррупциягә каршы көрәш буенча киңәшчесе Бөтенроссия конференциясендә катнашты

«Коррупциягә каршы тору диалектикасы» халыкара катнашында узган XIV Бөтенроссия конференциясе КИУГА Россиянең һәм чит илләрнең әйдәп баручы тикшеренүчеләрен, хакимият вәкилләрен, хокук саклау органнары һәм иҗтимагый оешмалар хезмәткәрләрен яңадан берләштерде. Конференциядә яшь тикшеренүчеләр, шулай ук студентлар актив катнаша. Конференция безнең илдә коррупциягә каршы эш буенча тикшеренүләр векторын билгели торган мөһим вакыйгаларның берсе булып тора. Алдагы конференцияләрдә катнашучыларның тәкъдимнәре Федераль кануннарда, РФ Президенты указларында, коррупциягә каршы гамәли эшчәнлектә чагылдырылган. Конференция эшендә Казан Мэрының коррупциягә каршы көрәш мәсьәләләре буенча киңәшчесе Кыям Беляев актив катнашты. Кыям Айрат улы коррупциягә каршы көрәш буенча Казан шәһәренең җирле үзидарә органнарында гамәлгә ашырыла торган уңышлы цифрлы проектлар турында сөйләде. Казахстан Республикасының Казандагы Генераль консулы Ерлан Искаков коррупциягә каршы көрәш эшендә Казахстан тәҗрибәсе белән уртаклашты. Үз позициясен Иран Ислам Республикасының Казандагы Генераль консулы Давуд Мирзахани да белдерде. Ул Иранның башка илләр-БРИКС әгъзалары белән коррупциягә каршы сәясәт өлкәсендә тәҗрибә уртаклашырга әзер булуын белдерде, Иранның актив рәвештә коррупциягә каршы милли чаралар күрүен һәм коррупциягә каршы көрәш буенча халыкара инициативаларда катнашуын билгеләп үтте. Коррупциягә каршы көрәш закон чараларын гына түгел, җәмгыятьнең мәдәниятен һәм менталитетын үзгәртүне дә таләп итә. Коррупциягә түземлелекне нуль дәрәҗәсендә формалаштыру өчен мәгарифкә һәм мәгълүмати эшкә игътибар бирү мөһим. Конференция нәтиҗәләре бу глобаль күренешкә каршы тагын да нәтиҗәлерәк көрәш өчен этәргеч булачак.